Arna-Voss i 2022

Det seier regionvegsjef Helge Eidsnes. Samstundes gir han klare signal om kva som må til for at oppstarten kan skje tidlegare enn midlane frå styresmaktene skulle tilseie:
– Dette er ein strekning der vi skal byggja veg og bane parallelt. Vegen er 100 prosent finansiert i andre periode i NTP, og jernbanen 80 prosent fullfinansiert. Men får vi til ei ordning med bompengar i forkant av bygginga, kan vi koma i gang tidlegare. Derfor trur eg at vi er i gang i 2022. 
 

 

Vegen Arna-Voss vart kåra som «Norges verste veg» i ein konkurranse som NRK nyleg gjennomførte. Bakgrunnen er at det har vore mange ulukker på vegstrekninga, i tillegg til at han er rasutsett. 

Regjeringa har bestemt at vegen skal oppgraderast, og at veg og bane skal byggjast i same trasé til ein estimert kostnad på 33 milliardar kroner.  No er førebels kostnad for Arna-Stanghelle sett til 21 milliardar kroner. Så det trengs pengar i budsjetta i åra som kjem for at vegen skal koma, og målet er å få utbygd heile strekninga frå Arna til Voss.  

Planprogram på høyring – framleis 10 år til opning
I slutten av april vart planprogram for E16 og Vossebanen Arna-Stanghelle lagt ut til offentleg høyring. Det er høve til å gi innspel fram til 6. juli. Det er statleg plan for prosjektet, og det er Kommunal– og moderniseringsdepartementet som er planansvarleg. 

– Det vil nok gå 5-6 år å byggja dette omfattande prosjektet. Vi bør kunna vera ferdig med Arna-Stanghelle på slutten av 2020-talet.  Det er storleiken på midlar og når midlane kjem som avgjer framdrifta. Kjem midlane tidleg, og i stor nok mengde, kan vi også koma i gang tidlegare og vera ferdig tidlegare, avsluttar Eidsnes.

 

 Det skal byggast veg og jernbane parallelt frå Arna til Voss. Kostnaden er rekna til 33 milliardar kroner.